თეა შარაშიძე — ქალი, რომელმაც ცხოვრების ყველაზე მძიმე ქარტეხილებიც ძალად და ადამიანებზე ზრუნვად აქცია

თეა შარაშიძე პროფესიით სოციოლოგი და დრამის მსახიობია, ასევე ტელეჟურნალისტიკის პირველი გამოშვების კურსდამთავრებული. მისი პროფესიული გზა მრავალფეროვანი, რთული და ამავე დროს გამორჩეულად ადამიანურია — გზა, რომელიც სხვადასხვა სფეროს გადაკვეთის მიუხედავად, ყოველთვის ერთ მთავარ ღირებულებას ემსახურებოდა: ადამიანებთან ყოფნას, მათ დახმარებას და საკუთარი ქვეყნის სამსახურში დგომას. ამ ეტაპზე იგი მუშაობს სსიპ საგანგებო სიტუაციების კოორდინაციისა და გადაუდებელი დახმარების ცენტრში, არის EMT ჯგუფის წევრი და ტერიტორიული რეზერვის ჯარისკაცი.

მისი პროფესიული ცხოვრება სტუდენტობიდან, 1993 წლიდან დაიწყო. პირველი ნაბიჯები ჟურნალისტიკაში გადადგა — მუშაობდა გაზეთ „ქალი და მამაკაცი“-ში კორესპონდენტად, შემდეგ გაზეთ „სუპერ პროზის“ რედაქტორად. მისი ცხოვრების ერთ-ერთი ყველაზე გარდამტეხი მიზეზი დედის ავადმყოფობა იყო. სწორედ ამ ტკივილმა და პასუხისმგებლობამ დაათმობინა საკუთარი დიდი ოცნება — მსახიობობა. თუმცა ამ დანაკლისის შემდეგ მის ცხოვრებაში შემოვიდა ქოლცენტრის სფერო, შემდეგ კი ჯანდაცვა — სივრცე, სადაც ადამიანებთან ყოველდღიური კონტაქტი, მათი საჭიროებების გაგება და მათზე ზრუნვა ნაწილობრივ ავსებდა იმ ემოციურ სიცარიელეს, რომელიც ერთ დროს ხელოვნების სამყაროდან წამოსვლამ დატოვა. ამ გზამ იგი მიიყვანა იქამდე, სადაც პროფესია მისთვის არა მხოლოდ სამსახური, არამედ მსახურება გახდა.

თეა შარაშიძის პროფესიულ ჩამოყალიბებაზე გავლენა არაერთ მნიშვნელოვან ადამიანს მოუხდენია. განსაკუთრებულად ასახელებს კოტე მახარაძეს, რომლის მხარდაჭერით გაბედა და ხელოვნების ინსტიტუტში ჩააბარა. გოგი გეგეჭკორის სიტყვებმა კი დღემდე შეუნარჩუნა განცდა, რომ შესაძლებლობა რომ ჰქონოდა, კარგი მსახიობი იქნებოდა. პროფესიულ პრაქტიკაში ასევე უმნიშვნელოვანესი როლი ითამაშა ლიკა ცაფირმა — ადამიანმა, რომელიც მაშინდელი სიმკაცრის მიუხედავად, მისთვის ქოლცენტრის ანბანისა და მარკეტინგულ-გაყიდვების აზროვნების ერთ-ერთი მთავარი მასწავლებელი აღმოჩნდა. შემდგომ ეტაპზე ირაკლი ელიაშვილისა და ჯანდაცვის სამინისტროს პროფესიონალი კადრების დახმარებით მან სისტემის ყველა პროგრამა და მიმართულება იმდენად სიღრმისეულად შეისწავლა, რომ ძალიან მოკლე დროში იმ ადამიანად იქცა, ვისაც სხვები დახმარებისთვის მიმართავდნენ. განსაკუთრებულად აღნიშნავს ეკატერინე ტიკარაძისა და თინათინ ხარძიანის მხარდაჭერასაც, რომელთა ნდობითაც კოვიდპანდემიის პერიოდში ცენტრალური ონლაინ კლინიკის ხელმძღვანელობა დაევალა.

მის კარიერაში ერთ-ერთი ყველაზე მნიშვნელოვანი მიღწევა 1505-ის სისტემის აწყობასა და ცენტრალური ონლაინ კლინიკის ხელმძღვანელობას უკავშირდება. ეს იყო ეტაპი, სადაც მისმა პასუხისმგებლობამ, ერთგულებამ, სამართლიანობამ და გუნდურმა აზროვნებამ განსაკუთრებულად იჩინა თავი. მისთვის სიტყვა „ჩვენ“ ყოველთვის უფრო მეტს ნიშნავდა, ვიდრე „მე“ — სწორედ ამიტომაც მის პროფესიულ იდენტობაში გუნდის ნაწილი ყოფნა და საერთო საქმისთვის ბრძოლა ერთ-ერთი ყველაზე ძლიერი შინაარსია.

დღეს მისთვის საამაყო ეტაპია EMT საქართველოს გუნდის წევრობა. ამ სტატუსში კიდევ უფრო მკაფიოდ იკვეთება მისი ცხოვრების მთავარი ხაზი — მზადყოფნა, ემსახუროს ადამიანს, დაეხმაროს მას კრიტიკულ მომენტში და საკუთარი შესაძლებლობები ქვეყნის სამსახურში ჩადოს. თავადაც ამბობს, რომ საჯარო სამსახური მისთვის შესაძლებლობაა, ბევრ ადამიანს გაუმარტივოს ცხოვრება, დაეხმაროს და ამით საკუთარი ქვეყნის განვითარებაში თავისი წვლილი შეიტანოს.

თეა შარაშიძისთვის ოჯახი დღეს აბსოლუტური პრიორიტეტია. იყო დრო, როცა 24/7 მუშაობდა და კარიერა ყველაფერზე წინ იდგა, მაგრამ იძულებითმა შეჩერებამ დაანახვა, რომ ყველაზე საიმედო და მნიშვნელოვანი მისი ოჯახი და ის ადამიანები იყვნენ, ვისაც ადრე ძალიან ცოტა დროს უთმობდა. სწორედ ამიტომ დღეს მისი დრო 18:00 საათის შემდეგ მთლიანად ოჯახს და შვილებს ეკუთვნის. ეს არის მისთვის არა მხოლოდ ბალანსი, არამედ შეგნებული არჩევანი — წარმატება არ უნდა ხდებოდეს იმ ადამიანების ხარჯზე, ვინც შენს ცხოვრებაში ყველაზე ძვირფასია.

მისი გზავნილი სხვებისთვის მარტივი, მაგრამ ძალიან ძლიერია: არასოდეს შეწყვიტონ ზრდა და განვითარება და ყველაფერი აკეთონ სიყვარულით. თავადაც მუდმივად ცდილობს იყოს მოძრაობაში, ისწავლოს, განვითარდეს და არ დაკარგოს სიფხიზლე არც ცხოვრებაში, არც კარიერაში. მისთვის წარმატება „უფრო მეტია“ — უფრო მეტი, ვიდრე თანამდებობა, უფრო მეტი, ვიდრე მხოლოდ კარიერული წინსვლა. ეს არის ღირსების შენარჩუნება, შინაგანი სიმტკიცე და უნარი, სწორ არჩევანს არ უღალატო მაშინაც კი, როცა კარიერულ საფეხურზე ასვლასა და პირად პრინციპებს შორის რთული გადაწყვეტილება უნდა მიიღო.

თეა შარაშიძის ისტორია არის მაგალითი იმ ქალებისთვის, ვისაც ცხოვრებამ არაერთი დარტყმა მიაყენა, მაგრამ მაინც არ დანებდნენ. ეს არის ქალის გზა, რომელიც გვახსენებს, რომ შეიძლება გადახდე ყველაზე მძიმე ქარტეხილებს, დაკარგო ძალიან ბევრი, მაგრამ მაინც არ უთხრა ცხოვრებას „არა“. პირიქით — ისევ იპოვო ძალა, ადგე, გააგრძელო და შენს მაგალითში სხვებისთვისაც იმედი დატოვო.