გასულ თვეს საზოგადოებაში საკმაოდ დიდი დაინტერესება გამოიწვია ჩვენმა კამპანიამ, სახელწოდებით “ქალები ერთმანეთისთვის”, რის შედეგადაც გადავწყვიტეთ ჩვენი ერთგული მკითხველისთვის კვლავ შემოგვეთავაზებინა მსგავსი ინიციატივა. ლიდერ ქალთა საზოგადოება წარმოგიდგენთ მორიგ საგაზაფხულო კამპანიას, სახელწოდებით – “ჩემი გზა & ჩემი სიძლიერე”.  გთავაზობთ ახალ, უნიკალურ გამოცდილებას, რომელშიც ყველა ქალბატონის ჩართულობა ფასდაუდებელია და რომელიც მიზნად ისახავს წარმოაჩინოს ქალების მრავალფეროვანი გამოცდილებები, მიღწევები, გამოწვევები და ძალა.

კამპანია “ჩემი გზა & ჩემი სიძლიერე” ქმნის პლატფორმას, რომელიც აჩვენებს, რომ წარმატება არ არის ერთგვაროვანი, არამედ ინდივიდუალური გზაა, რომელიც სხვადასხვა გამოცდილებას, ემოციას, გამოწვევასა და გამარჯვებას აერთიანებს. კამპანიის თითოეული მონაწილე ქალბატონი გაგვიზიარებს საკუთარ კარიერულ გზას და იმას, თუ რაში მდგომარეობს მისი სიძლიერე. პირადი ისტორიები კი შთააგონებს სხვა ქალებს და წარმოაჩენს მრავალფეროვან გზებს წარმატებისკენ.

დარეჯან ათანელიშვილი – სიმტკიცისა და შეუპოვრობის მაგალითი

დარეჯან ათანელიშვილი არის 46 წლის პროფესიონალი, რომელმაც ცხოვრების რთულ გამოწვევებს თავი გაართვა გამორჩეული სიმტკიცითა და მიზანდასახულობით. ილია ჭავჭავაძის სახელობის დასავლურ ენათა და კულტურათა უნივერსიტეტის კურსდამთავრებულმა, ინგლისური ენის სპეციალისტმა, პროფესიული გზა სამედიცინო სფეროში აირჩია. 2002 წლიდან კლინიკა “ღია გულში” მუშაობს, ხოლო 2015 წლიდან დღემდე კლინიკა “ღია გულსა” და შ.პ.ს. “ღია გული–საუნივერსიტეტო ჰოსპიტალში” ოფის–მენეჯერის პოზიციას იკავებს. მისი პროფესიული მოღვაწეობა გამორჩეულია წარმატებული მენეჯმენტით, რასაც ადასტურებს სერტიფიკატი “ეფექტური ლიდერობა და მართვა“, თუმცა სამომავლოდ პედაგოგიურ სფეროში დაბრუნებასაც გეგმავს.

დარეჯანის ცხოვრების ისტორია გამორჩეულია პირადი გამოწვევებითა და მათი გადალახვის უნარით. ცხოვრების ურთულეს პერიოდში, როდესაც მარტო დარჩა ორი შვილის აღსაზრდელად და ოჯახის სრული პასუხისმგებლობა საკუთარ თავზე აიღო, მან შეძლო არა მხოლოდ გადარჩენა, არამედ წარმატებით წინსვლაც. საკუთარი შრომით შეძლო ბინისა და მანქანის შეძენა, და რაც მთავარია, ტყუპი გოგონების – ნინოსა და ნუცა გრიგოლაშვილების – სამედიცინო განათლების უზრუნველყოფა, რომლებიც ამჟამად სახელმწიფო სამედიცინო უნივერსიტეტის მეორე კურსის სტუდენტები და სტიპენდიანტები არიან. მისი ცხოვრებისეული კრედო – “ჩემთვის დაუძლეველი არაფერია” – შთამაგონებელია ყველა ქალისთვის, ვისაც საკუთარი ძალების ნაკლები რწმენა აქვს და დამაჯერებლად მოწმობს, რომ მიზანდასახულობითა და შრომისმოყვარეობით შეუძლებელი არაფერია.

ეკატერინე ჯიქიძე – ქართული ტურიზმის ინოვაციური ლიდერი

ეკატერინე ჯიქიძე არის Guide of Georgia LLC-ის დამფუძნებელი და დირექტორი – ტურისტული კომპანიისა, რომელიც 2016 წლიდან საქართველოს ერთ–ერთ წამყვან შემომყვან ტუროპერატორად ჩამოყალიბდა. მისი ხელმძღვანელობით კომპანია სპეციალიზდება პერსონალიზებული ტურისტული პაკეტების შექმნაზე ოჯახებისთვის, წყვილებისა და ჯგუფებისთვის, რომლებიც დაუვიწყარ გამოცდილებას სთავაზობენ სტუმრებს. ეკატერინეს სტრატეგიული ხედვის წყალობით, კომპანიამ დაამყარა მჭიდრო პარტნიორული ურთიერთობები სპარსეთის ყურის ქვეყნების ტურისტულ სააგენტოებთან, ინდურ კომპანიებთან და ახლა ჩინურ ბაზარზეც აფართოებს საქმიანობას. მისი ლიდერობის პერიოდში, Guide of Georgia-მ მრავალი საერთაშორისო აღიარება მოიპოვა ინოვაციური მიდგომებისა და მაღალი ხარისხის მომსახურებისთვის.

ეკატერინეს პროფესიული გზა გამორჩეულია გაბედული გადაწყვეტილებებით, განსაკუთრებით მაშინ, როდესაც გამოწვევები აშკარად ჩანდა. 2020 წელს, გლობალური პანდემიის პირობებში, როდესაც ტურიზმის სექტორი უმძიმეს კრიზისს განიცდიდა, მან უსწრაფესად მოახერხა კომპანიის რეორიენტაცია და პირველთა შორის დაუბრუნდა აქტიურ საქმიანობას. არაბთა გაერთიანებულ საემიროებში გამოფენა–ბაზრობაზე მონაწილეობით, სადაც საქართველო მხოლოდ ოთხი კომპანიით იყო წარმოდგენილი, მან მნიშვნელოვანი ნაბიჯი გადადგა ახალი პარტნიორობების დამყარებისკენ. როგორც ქალი ლიდერი ტრადიციულად კაცების მიერ დომინირებულ სფეროში, ეკატერინე ცდილობს გაზარდოს ქალთა წარმომადგენლობა ტურიზმის სექტორში, უზრუნველყოფს მათ კარიერულ წინსვლას და ლიდერობის უნარების განვითარებას საკუთარ კომპანიაში, რითაც ხელს უწყობს გენდერული თანასწორობის დამკვიდრებას ქართულ ბიზნეს გარემოში.

ინა ნაცვლიშვილი – იუველირი დიზაინერი, რომელმაც სირთულეებს სძლია

ინა ნაცვლიშვილი წარმოადგენს ქართველი ქალის სიმტკიცისა და პროფესიონალიზმის შთამბეჭდავ მაგალითს. 16-წლიანი გამოცდილებით იუველირობის სფეროში, მისი კარიერა დაიწყო მეუღლის გვერდით, რომელიც ასევე ამ პროფესიის წარმომადგენელი იყო. თუმცა, როდესაც ცხოვრებისეულმა გარემოებებმა მათი გზები გაყო, ინა არ შეუშინდა დაბრკოლებებს და საკუთარი ძალებით გააგრძელა პროფესიული მოღვაწეობა. დღეს იგი არა მხოლოდ შთამბეჭდავ სამკაულებს ქმნის, არამედ საკუთარ ცოდნასა და გამოცდილებას უზიარებს ახალგაზრდა თაობას როგორც ტრადიციული, ისე თანამედროვე ონლაინ სწავლების მეთოდებით.

ინას ცხოვრებისეული ფილოსოფია მარტივი და ამავდროულად ღრმაა – “არაფერია შეუძლებელი ქალბატონებისთვის“. ეს პრინციპი მას ეხმარება მუდმივად იყუროს წინ, განვითარდეს და გადალახოს ნებისმიერი დაბრკოლება. მისი ისტორია იმის დასტურია, რომ პროფესიული ზრდისთვის უმთავრესია სიმტკიცე, შრომისმოყვარეობა და მიზანდასახულობა. იუველირობა მისთვის არა მხოლოდ ხელობა, არამედ ხელოვნებაა, რომელსაც სიყვარულითა და მონდომებით ეპყრობა. ინა ნაცვლიშვილის მაგალითი შთაგონების წყაროა მათთვის, ვინც საკუთარი ძალების რწმენით მიისწრაფის პროფესიული და პიროვნული წარმატებისკენ.

სილამაზის სფეროში წარმატებული ქართველი მეწარმე: Marita Beauty & Spa-ს, დამფუძნებლის – მარიამ ბლიაძის ისტორია

Marita Beauty & Spa-ს დამფუძნებლის, მარიამ ბლიაძის პირადმა გამოცდილებამ გახდა მისი პროფესიული გზის მთავარი შთაგონება. როგორც თავად აღნიშნავს, საკუთარ თავზე ზრუნვამ მის ცხოვრებაში მნიშვნელოვანი ცვლილებები მოიტანა, რაც სურვილად ექცა – ეს განცდა სხვებისთვისაც გაეზიარებინა. სწორედ ამ მოტივაციით დაიწყო მუშაობა სილამაზისა და ჯანმრთელობის სფეროში. ყველაზე მნიშვნელოვან გამოწვევად ის ასახელებს პერიოდს, როდესაც სირთულეების მიუხედავად, ბიზნესის დაწყების გადაწყვეტილება მიიღო, რამაც იგი როგორც პროფესიონალად, ასევე პიროვნულად გააძლიერა.

დღეს, როდესაც ქალები სულ უფრო მეტად ინტერესდებიან საკუთარ თავზე ზრუნვით და აცნობიერებენ, რომ სილამაზე მხოლოდ ვიზუალურ მხარეს არ გულისხმობს, Marita Beauty & Spa-ს დამფუძნებლის გზა ბევრისთვის შთაგონების წყაროდ იქცა. მისი ისტორია ადასტურებს, რომ სწორად დაგეგმილი შრომითა და მიზანდასახულობით შესაძლებელია საქართველოში საკუთარი იდეების წარმატებული რეალიზება. დღეს ის თავდაჯერებულ და უნიკალურ პროფესიონალად გრძნობს თავს, რაც სწორედ ამ გამოწვევებით სავსე გზის დამსახურებაა.