ელენე (ეკა) გრატიაშვილი — განათლება, გამოცდილება და მუდმივი განვითარების მაგალითი

ელენე (ეკა) გრატიაშვილი მრავალწლიანი პროფესიული გამოცდილების, აკადემიური განვითარების და პასუხისმგებლობით სავსე საქმიანობის გამორჩეული მაგალითია. იგი არის ბიზნესის ადმინისტრირების დოქტორი, ამჟამად ლექციებს კითხულობს საქართველოს ტექნიკურ უნივერსიტეტში, ხოლო წლების განმავლობაში წარმატებით საქმიანობდა როგორც ინგლისური ენის ლექტორი სხვადასხვა უმაღლეს სასწავლებელში. მის პროფესიულ გზას განსაკუთრებულ სიღრმესა და მრავალფეროვნებას მატებს როგორც განათლების სფეროში მიღებული გამოცდილება, ისე სამეცნიერო და საზოგადოებრივი აქტიურობა. 

მისი პროფესიული გზა ძალიან საინტერესო და შთამაგონებელია. ჯერ კიდევ სტუდენტობის პერიოდში გამოიკვეთა მისი შრომისმოყვარეობა და მაღალი აკადემიური პოტენციალი — მან არაერთხელ გაიმარჯვა სტუდენტურ სამეცნიერო კონფერენციებში და მიღებული აქვს დიპლომები და ჯილდოები როგორც უნივერსიტეტის რექტორისგან, ისე პრეზიდენტისგან. ასევე, იგი გახლავთ 4 სამეცნიერო სტატიის ავტორი. 2002 წელს წარჩინებით დაამთავრა თბილისის ს.ს. ორბელიანის სახელობის პედაგოგიური უნივერსიტეტი, ხოლო მოგვიანებით მრავალწლიანი პროფესიული კარიერა განაგრძო როგორც ილიას უნივერსიტეტში, ისე დავით აღმაშენებლის სახელობის ეროვნულ თავდაცვის აკადემიაში. 

ელენე გრატიაშვილის კარიერა რეალურად იმ დროიდან დაიწყო, როდესაც ჯერ კიდევ მეხუთე კურსის სტუდენტი იყო და უნივერსიტეტში ინგლისური ენის კათედრაზე ლაბორანტად დატოვეს. მოგვიანებით მან უკვე ლექციების კითხვაც დაიწყო. თავად ამ პერიოდს განსაკუთრებული სითბოთი იხსენებს, როგორც პროფესიული ჩამოყალიბების ერთ-ერთ ყველაზე ბედნიერ ეტაპს. შემდგომი წლებიც წარმატებული აღმოჩნდა — მუშაობა განაგრძო ეროვნულ თავდაცვის აკადემიაში, სადაც მისი შრომა და ერთგულება სათანადოდ დაფასდა. მიღებული აქვს „საქართველოს თავდაცვის სამინისტროს სისტემაში უმწიკვლო სამსახურისათვის“ მე-2 ხარისხის მედალი და არაერთი სამადლობელი სიგელი.

მისი პროფესიული განვითარება მხოლოდ პედაგოგიკით არ შემოიფარგლა. მიუხედავად იმისა, რომ წარმატებით მუშაობდა ინგლისური ენის მიმართულებით, ყოველთვის ჰქონდა სურვილი, ახალ სფეროშიც გამოეცადა საკუთარი შესაძლებლობები. სწორედ ამ სურვილმა მიიყვანა ბიზნესის ადმინისტრირების მიმართულებით დოქტორანტურამდე. სწავლა განაგრძო “საქართველოს საპატრიარქოს  წმიდა ანდრია პირველწოდებულის სახელობის ქართული უნივერსიტეტში”, მენეჯმენტის მიმართულებით, ხოლო მისი სადისერტაციო თემა იყო „ქალთა ჩართულობის პრობლემები სამხედრო სამსახურების მართვაში“. ეს კიდევ ერთხელ უსვამს ხაზს მის ინტერესს ქალთა ლიდერობის, მმართველობითი პროცესებისა და საზოგადოებისათვის მნიშვნელოვანი საკითხების მიმართ. 

ელენე გრატიაშვილი ყოველთვის დარწმუნებული იყო, რომ ქალებს შეუძლიათ იყვნენ ისეთივე წარმატებული ლიდერები და მმართველები, როგორც კაცებს — ზოგჯერ კი უფრო შედეგიანებიც. მისთვის ეს არ არის მხოლოდ თეორიული მოსაზრება; ეს არის ხედვა, რომელსაც საკუთარ გამოცდილებასა და დაკვირვებებს აფუძნებს. სწორედ ამიტომ მისი პროფესიული და აკადემიური საქმიანობა ხშირად დაკავშირებულია ლიდერობის, მოლაპარაკებების, ჰუმანური მიდგომებისა და ქალთა შესაძლებლობების წარმოჩენასთან. 

მისი განვითარებისთვის განსაკუთრებული მნიშვნელობა ჰქონდა საერთაშორისო გამოცდილებასაც. მას განათლება მიღებული აქვს ამერიკის შეერთებულ შტატებში, კანადასა და გერმანიაში, სადაც მიღებული აქვს შესაბამისი დიპლომები და სერტიფიკატები. ეს საერთაშორისო გამოცდილება მის პროფესიულ პროფილს კიდევ უფრო აძლიერებს და აჩვენებს, რომ მისთვის სწავლა, განვითარება და ახალი ცოდნის მიღება უწყვეტი პროცესია. თავადაც ამბობს, რომ ფაქტობრივად მთელი ცხოვრება სწავლობს და მუდმივად ცდილობს ფეხი აუწყოს პროფესიულ სიახლეებს. 

ელენე გრატიაშვილის ცხოვრებაში მნიშვნელოვანი ადგილი უჭირავს ადამიანურ ურთიერთობებსა და მხარდაჭერას. განსაკუთრებული მადლიერებით საუბრობს მშობლებზე, რომლებმაც ყველაფერი გააკეთეს, რათა ის დღეს იმ ადამიანად ჩამოყალიბებულიყო, ვინც არის. მისთვის ძვირფასია ყველა ის ადამიანი, ვინც ცხოვრების სხვადასხვა ეტაპზე მოტივაციას აძლევდა, აძლიერებდა და ეხმარებოდა, სირთულეებს ღირსეულად გამკლავებოდა. ამავე ღირებულებებით ხელმძღვანელობს თავადაც — ყოველთვის ცდილობს სხვებს დაეხმაროს, იქნება ეს თბილი სიტყვა, ემოციური თანადგომა თუ საქმიანი რჩევა. 

როგორც პედაგოგს, სტუდენტებთან განსაკუთრებული ურთიერთობა აქვს. მისი თქმით, საქმეს თუ სიყვარულით მიუდგები, მაქსიმუმს გააკეთებ და ადამიანებზე გულწრფელად იზრუნებ, წარმატება აუცილებლად მოვა. სწორედ ეს დამოკიდებულება აძლევს მას იმის საფუძველს, რომ სტუდენტებისგან მუდმივად გრძნობს სიყვარულსა და პატივისცემას — რაც მისთვის უდიდესი სტიმულია. 

მისი პირადი და პროფესიული ცხოვრება ერთმანეთთან ჰარმონიაშია. ელენე გრატიაშვილი მიიჩნევს, რომ როდესაც გიყვარს შენი პროფესია, აუცილებლად პოულობ გზას, რომ კარიერაც და ოჯახიც წარმატებით დააბალანსო. მისთვის წარმატება მხოლოდ მატერიალურ კეთილდღეობას არ ნიშნავს. წარმატებაა მაშინ, როცა აკეთებ საყვარელ საქმეს, გყავს ოჯახი, არ გეშინია ახალი გამოწვევების და ყოველი გადალახული ნაბიჯის შემდეგ უფრო მეტად რწმუნდები საკუთარ შესაძლებლობებში. ამავე ხედვას ამყარებს მისი საზოგადოებრივი ჩართულობაც — იგი იყო საპატრიარქოსთან არსებული მორწმუნე ქალთა საზოგადოების წევრი, რაც მის ღირებულებებს, საზოგადოებრივ პასუხისმგებლობასა და აქტიურ მოქალაქეობრივ პოზიციას კიდევ უფრო მკაფიოდ წარმოაჩენს.  

დღეს ელენე (ეკა) გრატიაშვილი აგრძელებს როგორც პროფესიულ, ისე პიროვნულ განვითარებას. პარალელურად გეგმავს ბიზნესში დამოუკიდებლად დამკვიდრებასაც და საკუთარ გამოცდილებას, ცოდნასა და ღირებულებებს ახალი მიმართულებითაც წარმატებით იყენებს. მისი გზავნილი მარტივი, მაგრამ ძალიან ძლიერი არის: აუცილებლად უნდა გიყვარდეს ის, რასაც აკეთებ, საქმეს პასუხისმგებლობით უნდა მიუდგე და არასოდეს შეგეშინდეს ახალი გამოწვევების — სწორედ ამ გზით მოდის ნამდვილი წარმატება.