გვანცა კობალაძე — ქალი, რომელმაც იდეა დიზაინად, ხოლო დიზაინი ემოციად აქცია

გვანცა კობალაძე ერთ-ერთია იმ ადამიანებს შორის, ვინც ღონისძიებას მხოლოდ „გაფორმებად“ არ აღიქვამს — მისთვის ეს არის ატმოსფეროს შექმნა, სწორად გათვლილი დეტალები, ვიზუალური სისუფთავე და იმ განცდის გაჩენა, როცა სტუმარს პირველივე წამიდან უჩნდება შეგრძნება: აქ ყველაფერი სიყვარულით და პროფესიონალურად არის გაკეთებული.

როგორც თავად ამბობს, დროთა განმავლობაში „პატარა ნიმუშიდან მასშტაბურ დიზაინებამდე“ მივიდა და დღეს უკვე შეუძლია დროის მენეჯმენტი ისე მართოს, რომ დრო არც ოჯახს და არც პროფესიას მოაკლოს. მისთვის ეს საქმიანობა არა მხოლოდ სამუშაოა, არამედ დიდი სიამოვნებაც — ყოველდღე განვითარება, წინსვლა და ახალი შესაძლებლობებია, რაც მისი ხასიათისთვის ბუნებრივია.

გვანცას აზრით, პროფესიას რომ ირჩევ, არჩევანზე ბევრი რამ მოქმედებს: უნარი, ნიჭი, ინტერესი, მოტივაცია, ოჯახი, ღირებულებები… თუმცა მის შემთხვევაში ყველაზე დიდი როლი ოჯახმა ითამაშა. ორ შვილთან ერთად რთულია იპოვო და შექმნა ისეთი საქმე, რომელიც საშუალებას მოგცემს ოჯახთან დროის გატარებაც შეძლო და პროფესიულადაც განვითარდე. სწორედ ამიტომ, მისთვის ეს სფერო აღმოჩნდა სწორი გზაც და სწორი გადაწყვეტილებაც — შემოქმედებითი, აქტიური და ამავდროულად ისეთი, სადაც პასუხისმგებლობის მართვა შეგიძლია.

საქართველოში 2018 წელს შეიქმნა G Wedding Company, რომელსაც გვანცა კობალაძე ხელმძღვანელობს. კომპანია მომხმარებლებს ყოველდღიურად აქტიურად ემსახურება და საზოგადოებაში დიდი მოწონებით სარგებლობს. გუნდის ერთ-ერთ მთავარ ნიშნად მიიჩნევა პროფესიონალიზმი და პოზიტიური ენერგია, რაც ბევრისთვის უკვე „G Wedding Company“-ს ხელწერაა. განსაკუთრებით აღსანიშნავია ის ფაქტი, რომ ეს ოჯახური საქმეა — თითქოს ერთი ოჯახის წევრები არიან ჩართულნი და თავიანთ საქმიანობაში დებენ იმ სიყვარულსა და ერთგულებას, რაც მათ აერთიანებთ. გუნდი მიიჩნევს, რომ სწორედ ასეთი დამოკიდებულებაა მიზეზი, რატომაც G Wedding Company საკუთარ სფეროში ერთ-ერთ მოწინავედ ითვლება: მომსახურება ერთ პაკეტში მოიცავს იმ ასპექტებს, რაც ღონისძიების დაგეგმვასა და ორგანიზებას დამკვეთისთვის ბევრად ამარტივებს.

გვანცა აღნიშნავს, რომ მისთვის, როგორც ქალისთვის, ეს საქმე არა მხოლოდ საინტერესო, არამედ აზარტულიცაა — რადგან შემოქმედებითი და ხშირად დამღლელი პროცესების პარალელურად, მას დედისა და მეუღლის როლიც აქვს. მისი თქმით, თვითშეფასებას განსაკუთრებით ზრდის ის, როცა ხედავს კარგად დაგეგმილ ღონისძიებას, ლამაზ ვიზუალს და კმაყოფილ მომხმარებელს — ეს არის გამოწვევები, რომლებსაც ყოველდღიურად ეჯახება და სიამოვნებით უმკლავდება. გვანცა იდეალისტია და თვლის, რომ ამ სფეროს ნამდვილად სჭირდება იდეალური გათვლები: სწორი დაგეგმვა, ორგანიზება, მართვა, დროის ჩარჩოებში გუნდური მუშაობა და ასევე ფანტაზია — რათა დღესასწაულის განწყობა მაქსიმალურად ზუსტად გადმოსცე და ფორსმაჟორულ სიტუაციებსაც მშვიდად გაუმკლავდე. ასეთ სისტემურ მიდგომას კი დამკვეთებისა და კომპანიებისგან დიდი ნდობა მოაქვს.

გვანცა ასევე ამბობს, რომ ბოლო პერიოდში შეკვეთებისა და დიზაინების რაოდენობა მაქსიმუმამდე გაიზარდა: რაც უფრო მაღლა იწევს ხარისხი, მით უფრო იზრდება პოპულარობა და რეიტინგი. ის კმაყოფილია საკუთარი შედეგებით და 2025 წლის მიმართ დიდი მოლოდინებიც აქვს — იმედი აქვს, რომ ყველა ჩანაფიქრს რეალობად აქცევს. მიუხედავად იმისა, რომ გეგმებზე წინასწარ საუბარი არ უყვარს და ბევრს სიურპრიზად ტოვებს, ერთ რამეს ხაზგასმით ამბობს: გუნდი გაფართოებას გეგმავს და კიდევ უფრო მეტი საინტერესო და დახვეწილი დიზაინის შექმნაზე იმუშავებს.

გვანცა კობალაძე ნამდვილად იმ ქალების რიგს მიეკუთვნება, ვინც შრომით, საქმის სიყვარულითა და თავდადებით ლიდერი ქალების გუნდს უერთდება და მათ შორის ღირსეულ ადგილსაც იკავებს. ის იშვიათი მაგალითია იმისა, როგორ შეიძლება ოჯახი და პროფესია ერთმანეთისგან არ გამიჯნო — პირიქით, ორივე ისე დაალაგო პრიორიტეტებად, რომ ერთისთვისაც და მეორისთვისაც ნაყოფიერი, ერთგული და შედეგიანი იყო.

და განსაკუთრებით სასიხარულოა, რომ გვანცა კობალაძე ლიდერ ქალთა საზოგადოებას მუდმივად გვერდში უდგას — წელს კი ლიდერ ქალთა საზოგადოების XIII ღონისძიებას გააფორმებს საინტერესო, თანამედროვე და შთამბეჭდავი დიზაინებით, რაც „წარმატების საღამო 2025“-ს კიდევ უფრო ეფექტურ, ელეგანტურ და დასამახსოვრებელ ატმოსფეროს შესძენს.