ლიდერ ქალთა საზოგადოების მორიგი აქტივობა
ცვლილებების აუცილებლობის გაცნობიერებითა და პოზიტიური ზეგავლენის მოხდენის გადაწყვეტილებით,ლიდერ ქალთა საზოგადოებამ გადაწყვიტა, ჩაეტარებინა აქტივობა სახელწოდებით: “გავულამაზოთ ერთი დღე ქეთის”
აქტივობა ეხებოდა ქალური სოლიდარობის აღნიშვნას, მოტივაციის გავრცელებას, სიკეთისა და ერთიანობის ძალის ჩვენებას. ქეთი არის ლაგოდეხიდან, მარტოხელა დედა, სოციალურად დაუცველი, შეზღუდული შესაძლებლობის მქონე და უაღრესად განათლებული ქალბატონი, რაც ჩვენთვის სიურპრიზი აღმოჩნდა. ჩვენი მიზანი მისი დღეების სილამაზითა და სიხარულით გაჟღენთა გახლდათ. გასჩენოდა იმედი, რომ არსებობენ ადამიანები, რომლებიც იზრუნებენ მასზე. მოცემული აქტივობა ვერ იქნებოდა წარმატებული კეთილგანწყობილი ადამიანების მხარდაჭერის გარეშე, რომლებიც ლიდერ ქალთა საზოგადოების დიდ გუნდში არიან. ქეთის ტრანსფორმაცია იყო როგორც ფიზიკური, ასევე ემოციური. მან მიიღო თითოეული მათგანისგან სითბო, სიყვარული და ის სერვისები, რომლებზეც მას წვდომა არასდროს ჰქონია. უფრო მეტიც, როგორც თავად გვითხრა, ოცნებასაც ვერ ბედავდა ამ ყველაფერზე. ეს ყოველივე კი იმის მანიშნებელია, რომ როდესაც ჩვენ ვიკრიბებით და ვიზიარებთ ამ სიკეთეს, ის გადამდები ხდება.
