ლიდერ ქალთა საზოგადოება წარმოგიდგენთ საშემოდგომო კამპანიის მეთერთმეტე ნაწილს – “მე ძლიერი ქალი ვარ!” ეს უნიკალური კამპანია გახდება სივრცე, სადაც ყოველი ქალბატონის მონაწილეობა განსაკუთრებულია და სადაც ვაღიარებთ და ვზეიმობთ ქალების მრავალფეროვან გამოცდილებებს, წარმატებებს, დაბრკოლებებს და შინაგან სიმტკიცეს.

ნათია გადელია – ციფრული ტრანსფორმაციის ექსპერტი საბანკო სფეროში

  ნათია გადელია, 40 წლის პროფესიონალი, 19-წლიანი გამოცდილებით საბანკო სფეროში, ამჟამად ახალ გამოწვევებს უმკლავდება სამშენებლო კომპანიის გაყიდვების მიმართულებით. პარალელურად, იგი მუშაობს სადისერტაციო ნაშრომზე თემაზე: “ფინტექი და ციფრული ტრანსფორმაცია საბანკო მომსახურების სფეროში: ბიზნესის განვითარების შესაძლებლობანი.” ნათიას თქმით, ბანკიდან მთავარი საგზალი, რომელიც მას დღესაც ეხმარება, არის “კლიენტებთან შექმნილი ნდობა, მდგრადი ურთიერთობები და ღირებული გამოცდილება.”

ნათია აღიარებს, რომ კარიერულ გზაზე ყველაზე დიდი გამოწვევა “პასუხისმგებლობების ზრდასთან ერთად მუდმივი სწავლისა და განვითარებისთვის დროის პოვნა” იყო. ამ სირთულის გადალახვა მან პრიორიტეტების სწორი განსაზღვრით, განვითარებაზე ინვესტირებით, ეფექტური დელეგირებითა და გამძლეობის წყალობით შეძლო. მის წარმატებას, როგორც თავად აღნიშნავს, განაპირობებს “მოზღვავებული გამძლეობა და მოქნილობა,” რაც აძლევს უნარს, “გაუმკლავდეს გამოწვევებს, გამოიყენოს სირთულეები შესაძლებლობებად და იზიარებს გარემოს საჭიროებებს.” ახალგაზრდა ქალებს ნათია ურჩევს: “დაუღალავად ისწავლონ და განვითარდნენ, ჰქონდეთ თამამი ამბიციები და არ შეეშინდეთ გამოწვევების.” საქართველოში ქალების პროფესიული განვითარებისთვის, მისი აზრით, მნიშვნელოვანია კარიერული შესაძლებლობების თანასწორი ხელმისაწვდომობა, მუშაობისა და ოჯახური ვალდებულებების ბალანსის მხარდაჭერა, მენტორობა და გენდერული სტერეოტიპების შემცირება.

თათული თეთრაული – ორმაგი ბიზნესლიდერი მემკვიდრეობის გამგრძელებელი

თათული თეთრაული, პროფესიით ტანსაცმლის მოდელიორ-დიზაინერი, ორი სხვადასხვა ბიზნესის წარმატებულ მენეჯერად ჩამოყალიბდა. მას საკუთარი ბრენდი “Glitter” აქვს, რომელიც საღამოს კაბების დიზაინსა და შექმნაზეა ორიენტირებული, სადაც მომხმარებლებს შეუძლიათ როგორც შეიძინონ, ასევე მოირგონ და იქირაონ მაღალი ხარისხის საღამოს კაბები. პარალელურად, თათული მართავს 35-წლიანი ტრადიციების მქონე ოჯახურ საწარმოს – რბილი ავეჯის ბიზნესს, რომელიც წლების მანძილზე მისი მშობლების შრომით ვითარდებოდა.

“ხშირად იწვევს გაკვირვებას, როდესაც მოდიან საწარმოში და მე ვხვდები,” – აღნიშნავს თათული, რომელსაც ქალ მეწარმედ არაერთი სტერეოტიპისა და წინააღმდეგობის გადალახვა მოუწია. განსაკუთრებით რთული იყო პერიოდი, როდესაც მშობლებმა პრაქტიკულად “ერთ დღეში გადააბარეს კომპანიის მართვა” და თათულიმ უნდა ესწავლა “როგორ ემართა წარმოება სულ მარტოს.” მიუხედავად იმისა, რომ ფიქრობდა საქმის მიტოვებაზე, მშობლების მიღწევების პატივისცემამ და თანამშრომლების მხარდაჭერამ მისცა ძალა გაეგრძელებინა გზა.

თათულის მთავარი მიღწევა ოჯახური ბიზნესის ცნობადობის გაზრდა გახდა. თუ მისი მშობლები “უბრალოდ დიდი სიყვარულით აკეთებდნენ საქმეს და არ ისახავდნენ მიზნად პოპულარობას,” თათულის აქვს “ჯანსაღი ამბიცია – გააცნოს საზოგადოებას მათი ნაწარმი და ადამიანები, რომლებიც დგანან ამ წარმატების უკან.” მისი გზავნილია: “თქვენ უფრო მეტი შეგიძლიათ ვიდრე ახლა ფიქრობთ… არასოდეს დანებდეთ იმიტომ რომ თქვენ ამას აუცილებლად შეძლებთ.”

ნანა ფიფია – მათემატიკოსი,დოქტორის ხარისხით-ოქროს სამკაულების ბიზნესის ლიდერობამდე

ნანა ფიფია, დოქტორის ხარისხის მქონე მათემატიკოსი, დღეს საკუთარი დაარსებული ოქროს სამკაულების მაღაზია “Gold Market”-ის დირექტორია. “ჩემი კარიერული გზის ყველაზე დიდი გამოწვევა იყო უნივერსიტეტის აუდიტორიიდან სამკაულების მაღაზიაში გადმოსვლა,” – აღნიშნავს ნანა, რომელმაც აკადემიური კარიერა ბიზნეს საქმიანობით ჩაანაცვლა. მისი თქმით, “Gold Market”-ში ადამიანებისთვის დაუვიწყარი ისტორიები და ბედნიერი მომენტები იქმნება, რაც მას უფრო მეტ სიხარულს ანიჭებს, ვიდრე ფორმულების ახსნა.

“ჩემს წარმატებას განსაზღვრავს გამბედაობა და სტერეოტიპების დამსხვრევა,” – ამბობს ნანა, რომელიც აღიარებს, რომ მიუხედავად გამოცდილების არქონისა, გაბედული ნაბიჯები გადადგა ბიზნესში. “ამ გზაზე ჩემი პროფესია მეხმარება – თითოეულ ნაბიჯს მათემატიკური სიზუსტით ვთვლი,” – აღნიშნავს ის. ნანას რჩევა დამწყებებისთვის მარტივია: “მიუხედავად იმისა გაქვთ თუ არა გამოცდილება ან ფინანსური რესურსი, არ შეგეშინდეთ და დაიწყეთ არა ხვალ, არამედ დღესვე.” საქართველოში ქალების პროფესიული განვითარებისთვის, ნანას აზრით, ყველაზე მნიშვნელოვანია სტერეოტიპების დამსხვრევა: “სწორედ მაშინ, როცა [უარყოფითი] სიტყვების მიუხედავად ნაბიჯი გადავდგი, მივხვდი რომ რეალური წინსვლა იწყება იქ, სადაც შიში და სხვების შეხედულებები არ გაჩერებს.”

სალომე გოგინაშვილი – ციფრული მარკეტინგის ექსპერტი და მენტორი

სალომე გოგინაშვილი, საერთაშორისო ურთიერთობებისა და პოლიტიკური მეცნიერებების განათლებით, დღეს ციფრული მარკეტინგის სფეროში მოღვაწეობს და საკუთარ კომპანიას – Digital Trends Co.-ს ხელმძღვანელობს. მისი პროფესიული გზა თბილისის სახელმწიფო უნივერსიტეტში სწავლით დაიწყო და ჰამბურგის უნივერსიტეტის მაგისტრატურაში გაგრძელდა, სადაც “როგორც აკადემიური, ასევე უდიდესი ცხოვრებისეული გამოცდილება” მიიღო.

“ყველაზე დიდი გამოწვევა იყო უცხო ქვეყანაში სწავლა და მუშაობა – ახალ ენასთან, კულტურასთან და სისტემასთან ადაპტაცია,” – იხსენებს სალომე, რომელმაც ეს გამოწვევა “შრომის, ნებისყოფისა და რწმენის” წყალობით დაძლია. მისი სიძლიერე “მუდმივი განვითარებისა და ახალი შესაძლებლობების ძიებაშია,” რაც მას საშუალებას აძლევს არასოდეს შეჩერდეს ერთ ადგილზე. “სწორედ ასე მივედი ციფრულ მარკეტინგამდე, რომელმაც საბოლოოდ ჩემი პროფესიული ცხოვრება განსაზღვრა,” – აღნიშნავს ის.

ახალგაზრდა ქალებს სალომე ურჩევს, “არ შეეშინდეთ შეცდომების და ცვლილებების,” რადგან “პროფესიული გზა იშვიათად არის სწორი და მარტივი ხაზი.” საქართველოში ქალების პროფესიული განვითარებისთვის, მისი აზრით, საჭიროა “მეტი შესაძლებლობა – განათლებაში, ტექნოლოგიებში და ბიზნესში,” რადგან “ქართველ ქალებს უდიდესი პოტენციალი აქვთ – მხოლოდ შესაბამისი პლატფორმაა საჭირო, რათა ეს შესაძლებლობები რეალობად იქცეს.”