“ლიდერ ქალთა საზოგადოება” ამაყად წარმოგიდგენთ ბარბარე ბეზარაშვილს – მედიცინის აკადემიურ დოქტორს, პროფესორს, ალერგოლოგ-იმუნოლოგს და ამიერკავკასიის ექიმთა ლიგის დამფუძნებელ პრეზიდენტს, რომელიც მედიცინის, განათლების და ახალგაზრდა სპეციალისტების განვითარების საქმეში უდიდეს წვლილს დებს.

სამედიცინო დინასტიის გამგრძელებელი

ბარბარე ბეზარაშვილის პროფესიული გზა ოჯახური ტრადიციების გაგრძელებაა. “საწყისი წერტილი ჩემი ოჯახიდან მოდის, სადაც ორივე მშობელი ექიმები იყვნენ და ცდილობდნენ პატარა ასაკიდან ჩემი დისთვის, რომელიც აგრეთვე ექიმი ალერგოლოგი, მედიცინის დოქტორი, პროფესორია, და ჩემთვის ესწავლებინათ ადამიანებზე ზრუნვა და სიყვარული,” – იხსენებს ბარბარე.

მისი დედა, მზია ლეჟავა, იყო პედიატრ-ალერგოლოგი და კლინიკური პედიატრიული ალერგოლოგიის ერთ-ერთი ფუძემდებელი. მამა, დიმიტრი ბეზარაშვილი, 35 წლის მანძილზე მთავარი ალერგოლოგი, მედიცინის დოქტორი, პროფესორი, კლინიკური ალერგოლოგიის ფუძემდებელი და “თბილისის საპატიო მოქალაქე”, დღემდე, 90 წლის ასაკში, “აკადემიკოს ჩაფიძის სახელობის კარდიოლოგიური კლინიკის” ალერგოლოგია.

პროფესიული მოღვაწეობა და მიღწევები

ბარბარე ბეზარაშვილი დღეს 17 კლინიკის, რეანიმაციის და სტაციონარის კონსულტანტია. ის ასევე ალერგიული დაავადებების მართვის დეპარტამენტის ხელმძღვანელი, კლინიკური განვითარების ხელმძღვანელი და ეთიკის კომისიის წევრია.

მისი პროფესიული კარიერის ერთ-ერთი უმნიშვნელოვანესი ნაბიჯი იყო ამიერკავკასიის ექიმთა ლიგის დაარსება 11 წლის წინ. “ერთ-ერთი გადატვირთული სამუშაო დღის დასასრულს, სწორედ იმ დღეს საქართველოს სხვადასხვა რეგიონებიდან მყავდა 7 სხვადასხვა პაციენტი დაუდგენელი დიაგნოზით, მივემგზავრებოდი წამყვან ექიმებთან ერთად საერთაშორისო კონფერენციაზე, სწორედ ჩამოსვლის შემდეგ დავაარსე ამიერკავკასიის ექიმთა ლიგა, რომელიც მიზნად ისახავს რეგიონულ სამედიცინო განვითარებას, ახალგაზრდების ხელშეწყობას,” – იხსენებს ბარბარე.

ამიერკავკასიის ექიმთა ლიგა, რომელიც მხოლოდ 11 წლისაა, მაგრამ უკვე აერთიანებს 3500-მდე როგორც საქართველოს, ასევე უცხოელ წამყვან სპეციალისტს, ბარბარეს ერთ-ერთი ყველაზე საამაყო მიღწევაა.

“შევძელით დაუღალავი შრომის შედეგად თითქმის ყოველთვიური უფასო გასინჯვებით დავხმარებოდით 500 000-მდე ჩვენს თანამოქალაქეს, შევძელით ჩვენი საერთაშორისო მეგობრობის ხარჯზე 57 ახალგაზრდა ექიმი, რეზიდენტი და სტუდენტი აბსოლუტურად უფასოდ გაგვეგზავნა ევროპის და თურქეთის წამყვან კლინიკებში კვალიფიკაციის ასამაღლებლად,” – ამაყად აღნიშნავს ის.

შთაგონების წყარო და ცხოვრებისეული ფილოსოფია

ბარბარეს შთაგონების ძირითადი წყარო მისი შვილია – გიორგი ადამია, რომელიც ამჟამად 26 წლისაა. “ჩემი შვილია, რომელმაც ძალზე პატარა ასაკში მოსალოც ბარათზე მომწერა: ‘ნუ შეგეშინდება წაქცევის, ისწავლე ადგომა და ამაყად განაგრძე სიარულიო’… ვცდილობ ეს ფრაზა ჩემი ცხოვრების წესად ვაქციო,” – ამბობს ბარბარე.

გამოწვევების დაძლევაში მას ეხმარება ე.წ. განწყობის თეორია – შინაგანი მზაობა რაიმე ქცევის განსახორციელებლად, როდესაც ხდება საჭირო უნარების გააქტიურება და მობილიზება. “ჩემს ცხოვრებაში განწყობის თეორიით ყოველდღიურად მიხდება თითქოსდა გამოუსავალი სიტუაციებიდან გამოსავლის მოძებნა და ერთი უნიკალური ფრაზის გამეორება: ‘ყველაფერი კარგად იქნება’,” – აღნიშნავს ის.

სოციალური პასუხისმგებლობა და ახალგაზრდების მხარდაჭერა

ბარბარე ბეზარაშვილის და ამიერკავკასიის ექიმთა ლიგის საქმიანობაში განსაკუთრებული ადგილი უჭირავს სოციალურ პასუხისმგებლობას და ახალგაზრდა სპეციალისტების მხარდაჭერას.

“შევძელით შშმ პირებისთვის განგვეხორციელებინა რამდენიმე პროექტი, რამაც ხელი შეუწყო მათი უნარების გამოვლენას, საზოგადოებაში ინტეგრირებას. შევძელით სხვადასხვა ტრენინგებისა და კონფერენციების ორგანიზებით მსოფლიოში არსებული სიახლეები, სხვადასხვა დაავადებების დიაგნოსტირების, პრევენციის და მკურნალობის საკითხებში მიგვეწოდებინა სოფლის და სხვადასხვა რეგიონების ექიმებისთვის,” – ამბობს ბარბარე.

მისი თქმით, ის მეტწილად იყენებს მეგობრულ კავშირებს ახალგაზრდა კოლეგების შემდგომი განვითარების ხელშესაწყობად, რადგან სჯერა, რომ ეს არის მისი პროფესიული და მორალური ვალდებულება.

წარმატების ფორმულა და რჩევები დამწყებთათვის

ბარბარე ბეზარაშვილი წარმატებას განსაზღვრავს როგორც “საქმის კარგი შედეგით დასრულებას, წინსვლას”. მას მიაჩნია, რომ წარმატების მიღწევა შესაძლებელია თავდაუზოგავი შრომით, მოთმინებით და საკუთარი შესაძლებლობების რწმენით.

“ბევრი ჩვენგანი ფიქრობს, რომ წარმატების უკან იღბალი, გამართლება დგას, თუმცა მე თუ მკითხავთ, გიყვარდეს ის საქმე, რასაც აკეთებ, იყო მიზანდასახული – ეს ის მყარი ფუნდამენტია, რომელზეც გრძელვადიანი წარმატება უნდა აშენდეს,” – ამბობს ბარბარე.

ახალგაზრდა სპეციალისტებს ის ურჩევს: “იყავით მიზანდასახულები, მუდმივად იზრუნეთ ცოდნის გასაღრმავებლად, არ შეუშინდეთ სიძნელეების გადალახვას, გიყვარდეთ ადამიანები… ‘სწავლა სიკვდილამდე’, ექიმი ყოველთვის უნდა ვითარდებოდეს.”

პირადი ცხოვრება და ღირებულებები

ბარბარე ბეზარაშვილისთვის ოჯახი ძალის მთავარი წყაროა. “მე მიყვარს ჩემი პროფესია და ძალას ჩემი ოჯახი მმატებს, განსაკუთრებით შვილიშვილი,” – აღნიშნავს ის.

მისი ცხოვრებისეული ღირებულებები ჩამოყალიბდა მშობლების მაგალითზე, “რომელთა ცხოვრება ნათელი მაგალითი იყო იმისა, თუ როგორი უნდა ყოფილიყო ექიმი, თავისი ცოდნით, ყურადღებით, თავდადებით და სიყვარულით.”

მომავლის ხედვა და გეგმები

ბარბარე ბეზარაშვილი მუდმივად ფიქრობს პროფესიულ განვითარებაზე და ცოდნის გაღრმავებაზე. “ექიმი ყოველდღიურად უნდა ცდილობდეს ცოდნის გაღრმავებას, სიახლის მოძიებას, სხვადასხვა კვლევებში მონაწილეობას, ცოდნის და გამოცდილების გაზიარებას, ზუსტად იგივეს ვცდილობ თავადაც,” – ამბობს ის.

მისი ერთ-ერთი ყველაზე დიდი სიხარული და მოტივაციის წყარო არის პაციენტების მადლიერება: “ალბათ ყველაზე მეტად მაბედნიერებს, ღვთის წყალობით და ჩემი ახალგაზრდა ასისტენტების გუნდური მუშაობის შედეგად, უამრავი გამოჯანმრთელებული პაციენტი და მათგან წარმოთქმული საოცარი ფრაზა: ‘მადლობთ ექიმო’…”

ნომინაცია: “წლის მენტორი – 2025”

“ლიდერ ქალთა საზოგადოება” მე-12 საზეიმო ღონისძიებაზე ბარბარე ბეზარაშვილს წარადგენს ნომინაციაში *”წლის მენტორი – 2025″*. ეს ნომინაცია აღიარებს მის განსაკუთრებულ წვლილს ახალგაზრდა სპეციალისტების პროფესიულ განვითარებაში და სამედიცინო განათლების ხელმისაწვდომობის გაუმჯობესებაში.

ბარბარე ბეზარაშვილი არის მენტორი სიტყვის სრული მნიშვნელობით – ის არა მხოლოდ თავად აღწევს პროფესიულ წარმატებებს, არამედ აქტიურად ეხმარება ახალგაზრდა ექიმებს, რეზიდენტებს და სტუდენტებს პროფესიული გზის გაკვლევაში. მისი ხელმძღვანელობით ამიერკავკასიის ექიმთა ლიგა გახდა პლატფორმა, რომელიც ახალგაზრდა სპეციალისტებს საშუალებას აძლევს განივითარონ უნარები, მიიღონ საერთაშორისო გამოცდილება და დაამყარონ მნიშვნელოვანი პროფესიული კონტაქტები.

“წლის მენტორი” არის ადამიანი, რომელიც საკუთარ ცოდნას და გამოცდილებას უანგაროდ უზიარებს სხვებს, ეხმარება მათ პროფესიულ ზრდაში და ქმნის შესაძლებლობებს მათი განვითარებისთვის. ბარბარე ბეზარაშვილმა 57 ახალგაზრდა ექიმის, რეზიდენტის და სტუდენტის ევროპისა და თურქეთის წამყვან კლინიკებში გაგზავნით, ასევე მრავალრიცხოვანი ტრენინგებისა და კონფერენციების ორგანიზებით, დიდი წვლილი შეიტანა ქართული სამედიცინო საზოგადოების განვითარებაში.

ამ ნომინაციით “ლიდერ ქალთა საზოგადოება” აღიარებს ბარბარე ბეზარაშვილის ღვაწლს არა მხოლოდ როგორც ექიმის, არამედ როგორც ლიდერის, რომელიც ქმნის სამედიცინო განათლების ახალ შესაძლებლობებს საქართველოში და ხელს უწყობს ახალგაზრდა პროფესიონალების წინსვლას.