ჟურნალისტიკიდან ჯანდაცვის მენეჯმენტამდე — მეგი საჯაიას პროფესიული გზა და ბრძოლა ადამიანების ჯანმრთელობისთვის

მეგი საჯაია პროფესიით ჟურნალისტია (ბაკალავრი) და საზოგადოებრივი ჯანდაცვის მაგისტრი. იგი ასევე არის მედიატორი. დღეს მეგი საჯაია ა(ა)იპ საქართველოს ჯანმრთელობის ფედერაციის ერთ-ერთი დამფუძნებელი და დირექტორია და ხელმძღვანელობს ეროვნულ პროექტებს, რომლებიც ადამიანის სიცოცხლის დაცვასა და ჯანმრთელობის ხელმისაწვდომობის გაუმჯობესებას ემსახურება.

მისი საქმიანობა არაერთი აღიარებით არის დაფასებული. მეგი საჯაიას აქვს დაავადებათა კონტროლისა და საზოგადოებრივი ჯანმრთელობის ეროვნული ცენტრის მადლობის სიგელები სისხლის უანგარო დონორობის განვითარების საქმეში შეტანილი წვლილისთვის, რაც კიდევ ერთხელ ხაზს უსვამს მის სისტემურ და შედეგზე ორიენტირებულ მუშაობას.

მეგის პროფესიული გზა 2006 წლიდან იწყება, როდესაც ის აქტიურად წერდა სამედიცინო თემებზე — დაავადებების პრევენციაზე, ჯანმრთელობის დაცვაზე და სამედიცინო დავებზე. 2012 წლიდან ის არის სამშობიარო „იმედის კლინიკის“ ჯანდაცვის ომბუდსმენი, ხოლო 2020 წლიდან — ა(ა)იპ საქართველოს ჯანმრთელობის ფედერაციის ერთ-ერთი დამფუძნებელი და დირექტორი.

მისი საქმიანობის მნიშვნელოვანი მიმართულებაა სისხლის უანგარო დონაციის პოპულარიზაცია და კიბოს სკრინინგის სახელმწიფო სერვისების ცნობადობის გაზრდა. ამასთან, მეგი არის ჯანდაცვის სამინისტროს მიერ აკრედიტებული ტრენინგის ავტორი და ტრენერი პაციენტთან კომუნიკაციის სტანდარტების მიმართულებით. ასევე აქტიურად მუშაობს სამედიცინო სამართლისა და ეთიკის თემებზე, სამედიცინო პერსონალის ცოდნის დონის ამაღლებასა და პაციენტთა უფლებების დაცვაზე.

მის ანგარიშზეა არაერთი უანგარო პროექტი, მათ შორის: „უსაფრთხო სოფელი“, „ექიმები გვიზიარებენ სიცოცხლეს“, უფასო სამედიცინო აქციები რეგიონებში და სხვა ინიციატივები, რომლებიც მიზნად ისახავს ჯანდაცვის სერვისების ხელმისაწვდომობის გაუმჯობესებას ქვეყნის სხვადასხვა კუთხეში.

განსაკუთრებით აღსანიშნავია, რომ მეგი მონაწილეობდა უცხოელ ექსპერტებთან და დაავადებათა კონტროლის ეროვნული ცენტრის ჯანმრთელობის ხელშეწყობის სამმართველოს კოორდინატორებთან ერთად საქართველოს სისხლის დონაციის კომუნიკაციის სტრატეგიის (Georgian Blood Supply Communication Strategy) 2022–2027 წლებისთვის შემუშავებაში. ეს პროცესი კიდევ ერთხელ ადასტურებს მის ჩართულობას სისტემურ ცვლილებებსა და ჯანდაცვის პოლიტიკის განვითარებაში.

მისთვის განსაკუთრებულად მძიმე და ამავდროულად სიხარულით სავსე პერიოდი იყო კოვიდპანდემია. სწორედ მაშინ, ჯანდაცვის სამინისტროსთან, ქვეყნის წამყვან ექიმებთან და კლინიკებთან თანამშრომლობით, მისმა ორგანიზაციამ შეძლო არაერთი ადამიანის დახმარება. 2020 წელი მეგისთვის გარდამტეხი აღმოჩნდა — მან მკაფიოდ გააცნობიერა, რომ ყველაზე დიდ სიამოვნებას ანიჭებს ის საქმე, რომელიც ყველაზე მეტად სჭირდება მის ხალხსა და ქვეყანას.

მეგი საჯაიას შთაგონების წყარო არიან ადამიანები, ვისაც დახმარება სჭირდება: პაციენტები, ვისი სიცოცხლეც უსაფრთხო სისხლის მარაგებზეა დამოკიდებული; ონკოლოგიური სენით დაავადებული ადამიანები, ვისთვისაც ადრეული დიაგნოსტიკა და სკრინინგი გადამწყვეტია; რეგიონებში მცხოვრები მოქალაქეები, ვისაც მაღალკვალიფიციურ ექიმთან ვიზიტი ხშირად დიდ სირთულესთან არის დაკავშირებული; პაციენტები, რომელთა უფლებებიც შეიძლება შეილახოს არაკვალიფიციური მოპყრობით; ექიმები, ვინც ვერ იცავენ საკუთარ ღირსებასა და პროფესიულ თავისუფლებას.

თავად ამბობს, რომ მისთვის „რთული სიტუაცია არ არსებობს“ — ყველა სირთულე საინტერესოა და განვითარებაში ეხმარება. მეგი საკუთარ ძლიერ მხარეებად ასახელებს შრომისმოყვარეობას, ენერგიულობას და მრავალწლოვან გამოცდილებას ჟურნალისტიკაში, ეროვნული პროექტების მართვაში, პაციენტთა უფლებების დაცვასა და სამედიცინო მედიაციაში.

მისთვის ყველა განხორციელებული პროექტი საამაყოა, თუმცა განსაკუთრებულად მნიშვნელოვნად მიაჩნია აკრედიტებული პროგრამა სამედიცინო ეთიკის, სამართლის, პაციენტთან კომუნიკაციის სტანდარტებისა და სტრესის მართვის მიმართულებით. მისი შეფასებით, ამ პროექტის წარმატებით განხორციელება შეიძლება საფუძვლად დაედოს ქვეყანაში სამედიცინო მედიაციისა და ჯანდაცვის ომბუდსმენის ინსტიტუტის შემდგომ განვითარებას.

მეგი ამბობს, რომ ყველა რესურსს იყენებს იმისთვის, რომ გარშემომყოფთა ცხოვრებაში დადებითი ცვლილებები შეიტანოს. ასევე ხაზს უსვამს, რომ შეძლო საოჯახო და საზოგადოებრივი საქმიანობის ჰარმონიული შეთავსება — ჰყავს მეუღლე და ორი შვილი, და ამ ყველაფერს ერთმანეთის პარალელურად წარმატებით მართავს.

მისი მთავარი გზავნილი მარტივია, მაგრამ ძალზე ძლიერი: ადამიანს შეუძლია მიაღწიოს ყველაფერს, რასაც მიზნად დაისახავს. აუცილებელია იარო წინ, აკეთო ის საქმე, რაც სიამოვნებას განიჭებს, და გქონდეს რწმენა. მისი თქმით, თუ ადამიანი სწორ გზას აირჩევს, უანგაროდ შეიყვარებს და იზრუნებს ადამიანებზე, მიიღებს იმ მადლს, რომელიც ყველაზე რთული საქმის გაკეთებასაც კი შესაძლებელს გახდის.

მეგი საჯაია მუდმივად სწავლობს ყველაფერს, რაც მის საქმიანობას სჭირდება, რადგან განვითარებას უწყვეტ პროცესად მიიჩნევს. მისთვის წარმატება მხოლოდ მატერიალური კეთილდღეობა არ არის — წარმატება არის საზოგადოებისთვის სასარგებლო საქმის კეთება და ქვეყნის განვითარებაში თუნდაც მცირე წვლილის შეტანა.