ლიდერ ქალთა საზოგადოებამ ნონა გივიაშვილი “პროფესიული ერთგულების ჯილდო – 2025” წარადგინა. ორგანიზაციის წარმომადგენლის განცხადებით, ქალბატონი ნონა გამორჩეულია თავისი თავდადებით, მოწოდებისადმი ერთგულებითა და პროფესიისადმი განსაკუთრებული დამოკიდებულებით.

“ნონა გივიაშვილი არის პედაგოგი, რომელიც თავისი საქმიანობით ყოველდღიურად ადასტურებს, რომ მასწავლებლობა არა მხოლოდ პროფესიაა, არამედ ცხოვრების წესი. მისი 19-წლიანი უწყვეტი და მიზანმიმართული საქმიანობა, მუდმივი პროფესიული ზრდისკენ სწრაფვა და მოსწავლეების მიმართ განსაკუთრებული პასუხისმგებლობა სწორედ ის კრიტერიუმებია, რომელთა გამოც ის იმსახურებს პროფესიული ერთგულების ჯილდოს,” – აღნიშნა ლიდერ ქალთა საზოგადოების თავმჯდომარემ.

ამავე ორგანიზაციის წარმომადგენლები ხაზს უსვამენ გივიაშვილის ღვაწლს გენდერული თანასწორობის მიმართულებით, განსაკუთრებით STEM მიმართულებებში გოგონების ჩართულობის წახალისებაში. “ქალბატონი ნონა თავისი მაგალითით და საქმიანობით უბიძგებს ახალგაზრდა გოგონებს, დაინტერესდნენ საბუნებისმეტყველო მეცნიერებებით, რაც ჩვენი ორგანიზაციის ერთ-ერთი მთავარი მიზანია,” – აღნიშნავენ ორგანიზაციაში.

“ბავშვებთან ურთიერთობა დიდ სიხარულს მანიჭებს და ენერგიას მაძლევს. მათთან კომუნიკაცია ჩემთვის ყველაზე საპასუხისმგებლო და ამაღელვებელი პროცესია,” – აღნიშნავს პედაგოგი.

ქალბატონი ნონა საკმაოდ ხშირად და აქტიურად იღებს მონაწილეობას რესურსცენტრის მიერ ორგანიზებულ კონფერენციებში, სადაც უზიარებს კოლეგებს საკუთარ გამოცდილებასა და ინოვაციურ მიდგომებს ბიოლოგიის სწავლებაში. მნიშვნელოვანია, რომ ის ჩართული იყო განათლების სამინისტროს პროექტში, რომელიც ახალი საგანმანათლებლო სტანდარტების შემუშავებას ეხებოდა. გივიაშვილმა მნიშვნელოვანი წვლილი შეიტანა სწორედ ახალ სწავლების მიდგომებთან დაკავშირებული კომპონენტების განვითარებაში.

კოლეგები ქალბატონ ნონას ახასიათებენ, როგორც თანამედროვე, შემოქმედებით და მოსწავლეზე ორიენტირებულ პედაგოგს, რომელიც მუდმივად ეძებს სწავლების ახალ და ეფექტურ გზებს.

გივიაშვილი მიიჩნევს, რომ “თითოეულ მოსწავლეში იმალება პოტენციალი, რომელიც სწორად უნდა იქნეს წარმოჩენილი და გაღვივებული”. ეს რწმენა მას ეხმარება იყოს “უფრო შემოქმედებითი, მოთმინებით სავსე და გულწრფელად დაინტერესებული” მოსწავლეების წარმატებებით.

მომავალი წლისთვის ნონა გივიაშვილს ამბიციური გეგმები აქვს. როგორც თავად აცხადებს, “ჩემთვის, როგორც პედაგოგისთვის უმნიშვნელოვანესია მუდმივი პროფესიული განვითარება, სწავლების ხარისხის გაუმჯობესება და კარიერული წინსვლა.” მას დაგეგმილი აქვს საერთაშორისო კვალიფიკაციის ამაღლების კურსის გავლა და ინოვაციური საგანმანათლებლო პროექტის განხორციელება, რომელიც მიზნად ისახავს მოსწავლეებში გარემოსდაცვითი ცნობიერების ამაღლებას.

“განათლების ხარისხი განსაზღვრავს ქვეყნის მომავალს. მასწავლებლის როლი კი განუზომელია მოსწავლის ცხოვრებაში, როგორც განათლების, ისე პიროვნული განვითარების მხრივ,” – ამ რწმენით აგრძელებს თავის საქმიანობას ნონა გივიაშვილი, პედაგოგი, რომელიც საკუთარი მაგალითით ადასტურებს, რომ სწავლება მართლაც მისიაა.